HAETZEL BRIDGE

တည်နေရာ – ဗနေးလ်ဘရက်ခ် (Bnei-Brak)၊ အစ္စရေးနိုင်ငံ​

Etzel တံတားသည် ဗနေးလ်ဘရက်ခ်မြို့၏ စက်မှုဇုန်အသစ်သို့ ဝင်ရောက်နိုင်ရန် ဒီဇိုင်းထုတ်ထားသော တံတားအစုအဝေးများအနက် ပထမဦးဆုံး တည်ဆောက်သည့် တံတားဖြစ်ပါသည်။ ဤစီမံကိန်းတွင် စတုရန်းမီတာ ၁.၅ သန်းရှိသော ရုံးခန်းနေရာများ ဒီဇိုင်းထုတ်ထားခြင်းလည်း ပါဝင်ပါသည်။ ထို့အပြင် ဤတံတားသည် လူနေအိမ်ခြေ ၂,၁၀၀ ခန့်ပါဝင်သော အနီးနားရှိ လူနေတိုက်ခန်းများသို့ သွားလာနိုင်ရန် လမ်းစဥ်ကိုလည်း ဖော်ဆောင်ပေးပါသည်။​

Etzel တံတားသည် အရှေ့နှင့် အနောက် ယာဉ်သွားလာမှုကို လွယ်ကူချောမွေ့စေပြီး Halehi လမ်းနှင့် အနာဂတ်တွင် ပေါ်ပေါက်လာမည့် Etzel လမ်းတို့ကို ဆက်သွယ်ပေးပါသည်။ မြေပြင်ထက် မြင့်သော အဝေးပြေးလမ်းမ (Elevated thoroughfare) တစ်ခုအဖြစ် လုပ်ဆောင်ပေးသည့်အပြင်၊ ဒေသခံများအနေဖြင့် အနီးနားရှိ လူနေတိုက်ခန်းများ၊ မြောက်ပိုင်းပန်းခြံနှင့် မြို့၏ အခြားအဓိကနေရာများသို့ အဆင်ပြေစွာ သွားလာနိုင်ရန် ကျယ်ဝန်းသော လူသွားစင်္ကြံများကိုလည်း ထည့်သွင်းတည်ဆောက်ထားပါသည်။​

တံတားသည် အခန်း (Span) ၁၃ ခန်း ပါဝင်ပြီး စုစုပေါင်းအလျား ၃၂၀ မီတာခန့် ရှည်လျားပါသည်။ အစွန်ဘက်ရှိ အခန်းများသည် ၂၀ မီတာစီရှိပြီး ကျန်ရှိသော ပုံမှန်အခန်းများမှာ ၂၇.၅ မီတာ ရှည်လျားပါသည်။ တံတား၏ အကျယ်မှာ အရှေ့ဘက်တွင် ၃၀ မီတာရှိပြီး အနောက်ဘက်တွင် ၂၅ မီတာသို့ ပြောင်းလဲသွားသဖြင့် စုစုပေါင်း ဧရိယာ ၁၀,၇၅၀ စတုရန်းမီတာခန့် ရှိပါသည်။ တံတားတည်ဆောက်မှုကို အဆင့် ၅ ဆင့်ခွဲ၍ ကွန်ကရစ်လောင်းခဲ့ပြီး တံတား၏ အလယ်ဗဟိုတွင် စတုရန်းမီတာ ၈၃၀ ရှိသော ဘဲဥပုံ ရင်ပြင်ကျယ် (Elliptical plaza) တစ်ခုဖြင့် အဆုံးသတ်ထားပါသည်။​

အပေါ်ပိုင်းတည်ဆောက်ပုံ (Superstructure) သည် ၁၂၅ စင်တီမီတာ အထူရှိသော လုပ်ငန်းခွင်အတွင်း လောင်းသွင်းသည့် ကွန်ကရစ်အခင်းပြား (Cast-in-place slab) ဖြင့် ဖွဲ့စည်းထားပြီး စုစုပေါင်း ကွန်ကရစ်ပမာဏ ၁၀,၅၀၀ ကုဗမီတာ ရှိပါသည်။ ၎င်းကို ၅၅၀ တန်ရှိသော ကွန်ကရစ်အကြိုအားဖြည့်ကြိုးများ (Post-tensioning cables) ဖြင့် အားဖြည့်ထားပါသည်။ အပေါ်ပိုင်းတည်ဆောက်ပုံ၏ ကြီးမားသော ထုထည်ပမာဏကြောင့် တံတား၏ အလယ်ဗဟိုမှ အပြင်ဘက်သို့ အဆင့် ၅ ဆင့်ခွဲ၍ အသေးစိတ် ကွန်ကရစ်လောင်းခြင်း လုပ်ငန်းစဉ်ကို ဆောင်ရွက်ခဲ့ပါသည်။ ပထမအဆင့်ကို အလယ်ဗဟိုရင်ပြင်မှ စတင်ခဲ့ပြီး နောက်ပိုင်းတွင် တံတား၏ လက်တံများသို့ ဆက်လက်လုပ်ဆောင်ခဲ့ပါသည်။ ကွန်ကရစ် ၅,၅၀၀ ကုဗမီတာ လောင်းသွင်းသည့် အဆင့်တွင် ကွန်ကရစ်ပန့် (Concrete pump) ၉ လုံးကို တစ်ပြိုင်နက်တည်း အသုံးပြုခဲ့ပါသည်။​